Lograr que as pesqueiras do río Miño sexan declaradas un Ben de Interese Cultural (BIC) é un reclamo histórico iniciado no Condado-Paradanta formalmente a finais dos anos 70. Máis de 40 anos despois, seguen sen ser BIC e a asociación de pescadores o Trabadoiro continúa reclamándoo.
O secretario do Trabadoiro, Florencio Gago:
A ameaza real de construción por parte de Fenosa dun embalse no Miño, o coñecido como Salto de Sela, foi a finais dos anos 70 o desencadeante para que os pescadores esixiran a protección das pesqueiras, existentes no Miño como postos fixos de pesca desde a Idade Media.
O reclamo de protección partiu por aquel entón do Arbense Distinguido 2021 e xa falecido, Ignacio Gago, sendo presidente da Cámara Agraria e ao ver en perigo un ben patrimonial e medio de vida para os arbenses.
A solicitude de que as pesqueiras do Miño sexan declaradas ben BIC xa chegou ao Parlamento de Galicia a través dunha proposición non de lei presentada polo BNG e foi aprobada no ano 2006. Con todo a petición non avanzou ao non incoar a Xunta o expediente. Recentemente, a petición vai volver ser abordada no Parlamento de Galicia a través dunha proposición non de lei presentada polo BNG.
Ademais, O Trabadoiro rexistrou recentemente no Concello de Arbo unha proposta para que o Pleno a aprobe e inste á Xunta e á Consellería de Cultura a aprobar esa Proposición non de lei e que se incoe o expediente para a súa declaración BIC.
Das ao redor de 500 pesqueiras existentes no Miño na beira galega, quedan na actualidade 386 pesqueiras en bo estado e delas poderianse explotar 130 aínda que na última tempada de lamprea foron dadas de alta unhas 110.
Florencio Gago, actual secretario do Trabadoiro, e neto de Ignacio Gago (presidente no pasado da asociación o Trabadoiro) falou en Si Radio de Galicia da necesidade de darlle esa protección BIC as pesqueiras dunha vez por todas, ante o seu constante deterioro.
