O paro baixou nunhas 1.173 persoas en Galicia no mes que vén de rematar. E o número total de parados rexistrados está en 153.300 na comunidade. É a terceira autonomía onde máis descendeu o desemprego no terceiro mes do ano.
O número de parados rexistrados nas oficinas dos servizos públicos de emprego de España baixou en 2.921 desempregados en marzo (-0,09 %), vinte veces menos do que descendeu en igual mes de 2021, cando retrocedeu en 59.149 persoas.
A caída do desemprego en marzo situou a cifra total de desempregados en 3.108.763 persoas, o seu menor nivel nun mes de marzo desde 2008, segundo datos publicados este luns polo Ministerio de Traballo e Economía Social.
O deste ano é o menor descenso da serie. Ata o de agora, érao o de 2013, cando o desemprego se reduciu en 4.979 persoas.
Galicia colócase entre as nove comunidades autónomas onde baixou o paro en marzo, coas Canarias á cabeza (-3.381 persoas), seguida das Illas Baleares (-3.014 persoas) e de Galicia. Pola contra, Andalucía (+1.911 persoas), País Vasco (+1.270 persoas) e Aragón (+1.140 persoas) son as comunidades autónomas onde máis subiu o paro o mes pasado.
