O Festival de Cans comeza este xoves 25 de xuño no Teatro João Verde de Monção ás 21:30 horas portuguesas, a primeira parte do Ciclo Cans Itinerante, na denominada Noite do Cine Clube Monção.
Este ciclo levará as curtas premiadas na última edición do certame por ata catro localidades do Norte de Portugal. É o maior número de localidades dos últimos anos, nos que o certame foi elixido entre os festivais que puntúan para os Premios Goya.
Ademáis de Monção, as curtas proxectaranse este ano en Caminha o 4 de Setembro, no Teatro Valadares, en Ponte de Lima o 13 de outubro no Cine Teatro Diogo Bernardes, e na primeira semana de Nadal no Centro Cultural de Paredes de Coura.
En cada un destes espazos o público poderá asistir ás proxeccións de María Rita, de Juan Barbazán, gran triunfadora do Festival de Cans co Premio do Xurado, Premio das Veciñas e Veciños e Premio RC Service á Mellor Fotografía; Cara de Cona, de Guillermo de Oliveira, Premio do Público e Premio AISGE ao Mellor actor para Nancho Novo e O Corpo de Cristo, de Bea Lema, Premio de Animación e Premio á Mellor Banda Sonora para Paloma Peñarrubia.
Ademáis, tamén poderán ver o documental “Cans, unha aldea de cine”, arredor das singularidades deste festival no que multitud de directores, actores e actrices conviven cos veciños e veciñas vendo cine nos seus baixos e jalpóns, e que na última edición logrou reunir nesta aldea de O Porriño a máis de 12.000 persoas nos cinco días de certame.
Este Ciclo Cans Itinerante articularase en dúas partes, a primeira por estas catro localidades do Norte de Portugal, e a segunda prepárase nos últimos meses do ano, en varias grandes cidades de toda Europa. O obxectivo deste ciclo é visibilizar a obra das novas e novos creadores galegos, proxectar a idea do Festival de Cans en cidades menos habituais, e mediar na proxección internacional do cinema galego.
