A situación xudicial de Gonzalo Pérez Jácome complícase. A Fiscalía de Ourense rexeitou os argumentos do alcalde contra a súa imputación e solicitou formalmente que sexa xulgado por un delito continuado de prevaricación. O Ministerio Público sostén que o rexedor compatibilizou o seu salario público en réxime de dedicación exclusiva con actividades privadas que lle reportaban beneficios económicos “importantes”.
Tal e como informou o xornalista Miguel Ascón, o fiscal destaca no seu escrito que as ganancias empresariais de Jácome —derivadas principalmente da súa televisión local, Auria TV, e dunha tenda de música— chegaron a duplicar o seu soldo como alcalde, alcanzando ingresos brutos de 162.000 euros anuais.
Un informe “ao gusto do alcalde”
Para evitar o banco dos acusados, Jácome presentou un recurso apoiándose nun informe de 2019 elaborado por Juan Ramón Costas, daquela xefe da asesoría xurídica e actual city manager do Concello. Porén, a Fiscalía cualifica este documento como carente de “profesionalidade” e coincide co xuíz instrutor en que foi redactado “ao gusto” do rexedor.
O fiscal non cre a versión de Jácome de que non realizaba actividade ningunha en Auria TV, afirmando que esa alegación non resulta cribles dado o elevado nivel de ingresos.
Sabía que necesitaba o permiso do Pleno
O eixo da acusación de prevaricación reside en que o alcalde era plenamente consciente da ilegalidade. Segundo a Fiscalía, Jácome “sabía perfectamente” que debía solicitar a compatibilidade ao pleno municipal, xa que fora advertido anteriormente polo Tribunal de Contas e pola propia Fiscalía.
O escrito sinala que o alcalde nunca pediu este permiso porque era consciente de que sería denegado, especialmente despois de que en 2021 o pleno aprobase esixirle a devolución dos seus salarios.
Pendentes da Audiencia Provincial
O caso queda agora en mans da Audiencia Provincial, que debe resolver dous recursos:
- O do alcalde: que busca o sobresemento da causa.
- O da acusación particular: exercida polo exconcelleiro Telmo Ucha, quen pide que Jácome sexa xulgado tamén por malversación e falsidade documental (un extremo que a Fiscalía non apoia).
Polo momento, o Ministerio Público mantén a súa petición de que o líder de Democracia Ourensana responda ante a xustiza por cobrar do erario público mentres mantiña as súas lucrativas actividades empresariais sen autorización.
