De madrugada tirada na estrada e moi grave polo golpe que lle propinaron na cabeza. Así atoparon á veciña de Carballo, de 43 anos, que foi agredida, presuntamente, polo seu marido de 44 anos, quen foi detido cando ía entregarse tras fuxir tras a agresión.
Novo caso de violencia machista en Galicia. De madrugada na parroquia de Sísamo, no concello de Carballo, este luns.
Un home agrediu presuntamente a súa muller, quen foi atopada tirada na estrada. Unha testemuña atopouna e avisou ás forzas de seguridade. O seu estado é crítico actualmente no hospital da Coruña.
Ao lugar o 061 enviou dúas ambulancias e persoal sanitario do PAC de Carballo. Unha ambulancia de soporte vital avanzado, logo dunha primeira asistencia no lugar, trasladou á muller ferida ao Complexo Hospitalario da Coruña (CHUAC), confirmaron fontes sanitarias.
Agora a víctima, nai de dous fillos de curta idade, permanece ingresada na UCI do hospital coruñés con graves feridas na cabeza.
O suposto autor da agresión foi detido cando acudía a entregarse, tras horas fuxido. O arresto produciuse contra ás 10.15 horas, no control de entrada da Comandancia da Coruña.
A parella ten dous fillos menores de idade e no momento da agresión estaban na vivenda.
Os bombeiros tiveron que acceder ao interior para poder facerse cargo deles.
Temporalmente quedaron baixo a custodia dos avós.
