O Tribunal de Instancia de Verín ditou a absolución dun mozo cigarrón que fora denunciado por un delito leve de lesións. A acusación baseábase nun incidente ocorrido o 4 de marzo de 2025, durante o Martes de Entroido, cando unha muller embarazada denunciou recibir un latigazo mentres participaba no desfile da vila.
A sentenza, aínda que recoñece que as lesións sufridas pola denunciante teñen entidade penal e recalca que a festa “non pode amparar excesos que ninguén está obrigado a tolerar”, conclúe que non existen probas suficientes para condenar ao investigado. A xuíza, facendo uso do principio in dubio pro reo, considera que as testemuñas achegadas pola vítima —o seu marido e o seu pai— forman parte do seu núcleo familiar e non constitúen probas imparciais que permitan desvirtuar a presunción de inocencia do acusado.
Versións contrapostas
Durante o xuízo, celebrado a principios deste mes, a denunciante sostivo que a agresión foi intencionada. Relatou que, pese a avisar ao cigarrón de que estaba embarazada e de que tiña o seu fillo menor ao lado, este non mostrou preocupación nin arrepentimento, limitándose a responder: “Eu pego así”. A muller achegou unha fotografía do acusado, feita tras o suceso cando este se retirou a careta, para demostrar que el fora o autor.
Pola súa banda, o mozo cigarrón negou en todo momento os feitos. Asegurou que ninguén o recriminou durante o desfile e que descoñecía o incidente ata que foi citado pola Garda Civil. Un amigo do acusado, que tamén participou na comparsa ese día, declarou a favor da súa versión, asegurando que non escoitou ningunha queixa na zona.
Falta de probas obxectivas
A maxistrada subliña na resolución que, aínda que a declaración da denunciante se mantivo coherente no tempo, a ausencia doutras testemuñas alleas ao entorno da vítima impide decantarse por unha versión sobre a outra. “Non se aporta ningún elemento obxectivo” para enervar a presunción de inocencia, conclúe o fallo.
A sentenza non é firme e pode ser recorrida en apelación ante a Audiencia Provincial de Ourense nun prazo de cinco días.
