A Policía Local de Cangas detivo este luns un home tras protagonizar unha violenta disputa familiar que rematou cunha agresión con arma branca. Os feitos ocorreron arredor das 16:00 horas na zona da Madalena, momento no que o servizo de emerxencias 112 deu o aviso aos axentes sobre un altercado entre varios familiares.
Ao chegar ao lugar, a patrulla interceptou o presunto agresor, que foi retido sen opoñer resistencia, aínda que baixo medidas de precaución pola posible presenza de armas. Nas inmediacións da propiedade, os axentes localizaron un machete con restos de sangue, que tería sido empregado no ataque.
Discrepancias familiares
A vítima, que presentaba feridas visibles na cabeza e nunha extremidade superior, recibiu asistencia sanitaria in situ antes de ser trasladada a un centro hospitalario para avaliar o alcance das súas lesións.
Segundo as primeiras investigacións, a orixe do enfrontamento estaría relacionada con desavinzas familiares pola organización dos coidados dunha persoa maior. O detido permanece baixo custodia policial á espera de que se instrúan as dilixencias oportunas sobre o suceso.
