O grupo automovilístico chinés SAIC pon en marcha os seus primeiros movementos oficiais en Ferrolterra. A compañía enviou un dos seus grandes buques portavehículos, o Anji Forever, para realizar unha proba operativa no Porto Exterior de Ferrol. Esta escala, prevista para o próximo 8 de xullo, servirá para testar as capacidades da infraestrutura e determinar os investimentos necesarios para acoller a futura produción de coches da marca MG.
O Anji Forever, un buque de 228 metros de eslora pertencente á filial Anji Logistics, xa navega cara a Galicia tras partir o pasado 1 de xuño do porto chinés de Lianyungang. Durante esta parada, está previsto que a embarcación desestibe un cargamento de vehículos MG, reactivando así as operacións de tipo ro-ro no recinto portuario ferrolán.
Unha planta de 200 millóns de euros
A elección de Ferrol como base para a súa primeira factoría en Europa supón un investimento inicial de 200 millóns de euros. O modelo de negocio que manexa o grupo estatal chinés céntrase na montaxe de vehículos baixo o sistema CKD (completely knocked down), que consiste en importar coches desmontados en contedores desde China para o seu ensamblaxe final en Galicia.
Segundo os plans avanzados pola empresa e confirmados polo presidente da Xunta, Alfonso Rueda, o obxectivo é acadar unha produción de 60.000 vehículos a partir de 2028, chegando a duplicar esta cifra ata os 120.000 unidades nunha fase posterior.
Esta aposta industrial estrutúrase arredor de dous eixos xeográficos: o Porto Exterior de Ferrol como base loxística e de montaxe central, e As Pontes, que se consolida como punto estratéxico para a subministración de compoñentes. Con este movemento, a compañía busca asegurar a viabilidade loxística dun proxecto que pretende converter a Galicia nun nodo clave para a expansión da marca chinesa no mercado europeo.
