O Pazo de Mariñán, en Bergondo, acolle desde este mércores a nova edición da Escola de Verano do Ministerio Fiscal. Durante tres días, profesionais de toda España debatirán sobre a tutela e protección das vítimas nun marco xurídico que, segundo a fiscal superior de Galicia, Carmen Eiró Bouza, debe estar guiado polo “lado máis humano da Xustiza”.
Eiró Bouza, que inaugurou o encontro, foi rotunda ao recordar que tras cada expediente xudicial “hai persoas que sofren e que necesitan ser atendidas e tratadas con dignidade”. O obxectivo central do curso é mellorar a resposta institucional ante colectivos vulnerables, como os afectados por violencia de xénero ou sexual, menores, persoas con discapacidade, vítimas de trata ou delitos de odio.
Evitar a revitimización
Un dos eixos fundamentais das xornadas é a loita contra a revitimización, unha situación que a fiscal superior considera que só se pode evitar cun cambio no enfoque corporativo e institucional. “As vítimas necesitan unha atención personalizada e unha presenza adecuada nos xulgados que evite, por exemplo, desprazamentos innecesarios que só aumentan a súa sensación de desprotección”, sinalou Eiró.
O programa tamén reserva un espazo para analizar o papel da Fiscalía ante as grandes catástrofes. A máxima responsable dos fiscais galegos puxo como exemplo a xestión tras o accidente do Alvia en Angrois, subliñando que nestes escenarios a institución ten a responsabilidade extra de acompañar ás familias e garantir que o proceso legal non sexa unha carga engadida para quen xa sufriu o impacto da traxedia.
O acto inaugural contou coa presenza de diversas autoridades, entre elas o director xeral de Xustiza da Xunta, José Tronchoni; a fiscal de sala do Tribunal Supremo e directora da Escola de Verano, Ana Isabel García León; o director do Centro de Estudios Jurídicos, Ignacio Sola; o fiscal xefe da Coruña, Miguel Armenteros; a delegada da Xunta na Coruña, Belén Docampo; e a alcaldesa de Bergondo, Alejandra Pérez Máquez.
 para analizar como mellorar a protección das vítimas e evitar a súa revitimización nos xulgados.){kind=link}