Concedidas 42 axudas por 2,9 millóns de euros a afectados polos incendios forestais: A maioría, en Ourense

O presidente da Xunta, Alfonso Rueda, destacou hoxe que o Executivo autonómico xa concedeu 42 axudas a propietarios de vivendas afectadas pola vaga de incendios forestais por un importe de 2,9 millóns de euros. Delas, a gran maioría -37 – corresponden a inmobles situados na provincia de Ourense.

“Recibimos 137 solicitudes, 129 en Ourense e a maioría das xa concedidas foron para residencias habituais”, explicou o presidente que fixo un balance da resolución das principais axudas postas en marcha polo Executivo autonómico a finais de agosto para paliar os efectos da vaga de lumes.

No eido económico, Rueda indicou que a Xunta recibiu 22 peticións de axudas das que “xa se revolveron 10 por un importe de 280.000 euros”. Todas elas corresponden á provincia de Ourense. Do mesmo xeito, Ourense tamén concentrou a maioría de solicitudes para a recuperación dos Terreos Cinexéticamente Ordenados (Tecores). Das 59 peticións de axudas, 42 foron de propietarios de Ourense. Xa están resoltas 24 que permitiron aboar 180.000 euros aos beneficiarios.

Danos na biosfera

En canto as axudas destinadas á reparación de danos en reservas da biosfera e espazos protexidos, a Xunta recibiu 12 solicitudes -oito na provincia de Ourense- das que xa se resolveron sete por un valor de 200.000 euros.

Por último, Rueda salientou que se “solicitaron 1.342 axudas agrícolas e 285 forestais” que, están na fase de comprobación. “O compromiso da Xunta é que antes que remate o ano estean pagadas canto menos o 80%”, indicou.

O presidente salientou que todos os departamento do Executivo autonómico están a traballar “coa máxima celeridade” para axilizar a tramitación e resolución das achegas dirixidas aos afectados polos lumes forestais. Unha premura que, lamentou, contrasta coa actitude do Goberno central que “nin sequera convocou” as axudas estatais para paliar os danos da vaga de incendios.