O presidente da Deputación de Ourense, Luis Menor, vén de propor no Congreso Internacional de Termalismo celebrado en Archena (Murcia) a posta en marcha dun “programa de respiro” para as persoas maiores que sufriron as consecuencias da DINA na Comunidade Valenciana.
Luis Menor asegurou que a iniciativa “xa conta co visto bo dalgúns balnearios da provincia de Ourense” e asegura que “solicitou a incorporación de balnearios de toda España”, co fin de poñer a disposición plazas termais para as persoas afectadas.
“A nosa aportación sería humilde fronte á gran cantidade de necesidades destas persoas” dixo o presidente provincial, quen pediu tamén o “apoio de máis administracións e vilas termais para ofertar un volume suficiente de prazas balnearias e poder chegar así a máis persoas“.
Segundo informou durante o congreso, a Deputación de Ourense xa mantivo contacto con algúns dos municipios máis afectados da comunidade valenciá, “que están valorando a proposta”. “A través dos seus servizos sociais municipais, un determinado número de persoas terían a posibilidade de desconectar da dura realidade que viven cunha estancia nun balneario, contribuíndo así á súa recuperación anímica e física” asegurou Menor.
Ademais, a iniciativa foi presentada a Renfe para poder ofrecer este medio de transporte dentro da proposta. Do mesmo xeito, tamén foi trasladada a idea á Rede de Cidades Saudables da FEMP.
