O Goberno galego aprobou este luns un teito de gasto para o exercicio de 2027 que supera por primeira vez os 15.000 millóns de euros, o que supón un incremento do 5,5 % e achega 782 millóns máis ás contas autonómicas do vindeiro ano. Tal e como informaron o presidente da Xunta, Alfonso Rueda, e o conselleiro de Facenda, Miguel Corgos, este crecemento prodúcese a pesar de finalizar o mecanismo extraordinario de apoio financeiro da Unión Europea pola pandemia, cubrindo os fondos con recursos ordinarios. O obxectivo do Executivo é cumprir os prazos para que os orzamentos entren en vigor o 1 de xaneiro, debendo celebrarse un pleno extraordinario no Parlamento galego esta mesma semana para aprobar este límite non financeiro.
Os retos principais para o vindeiro exercicio céntranse no blindaxe dos servizos públicos, o impulso á política de vivenda e o Xacobeo de 2027. Segundo o cadro macroeconómico presentado, estímase que o PIB medre un 1,9 % —dúas décimas menos que este ano polas incertidumes internacionais como a guerra comercial e os conflitos bélicos—, mentres que a taxa de paro descenderá ata o 7,7 %. Pola súa banda, Miguel Corgos destacou que se trata do primeiro teito sen recursos extraordinarios e que a previsión é reducir a débeda sobre o PIB por debaixo do 13 %, criticando ao mesmo tempo a inestabilidade do Goberno central e a falta de novos orzamentos do Estado dende 2023.
Rueda rexeita a quita da débeda e o BNG critica a “falta de ambición”
Durante a rolda de prensa, o presidente galego referiuse ao rexeitamento de Galicia a solicitar a quita da débeda aprobada polo Congreso, valorada en 4.010 millóns de euros. Rueda sinalou que a comunidade o que demanda é un sistema de financiación xusto e criticou que a proposta actual outorga a Galicia menos do 3 % da financiación a pesar de contar co 6 % da poboación. Para o mandatario, a condonación da débeda implicaría asumir a mutualización do endeudamento doutras rexións sen dispoñer deses cartos para gastar.
En contraposición, dende a oposición, a portavoz de Facenda do BNG, Noa Presas, cualificou o proxecto de teito de gasto como unha mostra de “falta de ambición política” e considerou que preludia uns orzamentos “repetitivos” que non darán resposta aos servizos públicos nin á transformación económica que precisa Galicia.
