O Real Club Deportivo da Coruña cambia de nome. Tras décadas de debate social, a entidade branquiazul modificou a súa denominación oficial para adaptala ao topónimo da cidade, tal e como ratificaron os seus socios nunha consulta vinculante cuxos resultados se fixeron públicos este martes na Xunta Extraordinaria de Accionistas celebrada en Abanca Riazor.
A participación na enquisa, que estivo aberta desde o pasado mércores ata o domingo, acadou o 55,96% da masa social. Do total de votos emitidos, o 79,41% optou por actualizar o nome, mentres que o 20,59% preferiu manter a denominación anterior. A consulta estivo dirixida aos abonados e socios “amigo” maiores de 12 anos.
Unha vitoria histórica para a afección
O cambio de nome pon fin a unha reivindicación recorrente entre a afección deportivista desde que, en 1998, a cidade pasou a chamarse oficialmente A Coruña. Coincidindo coa celebración do seu 120º aniversario e a súa recente volta á Primeira División, o club decidiu atender esta petición histórica impulsada por diversas iniciativas da masa social.
Deste xeito, o club pasará a chamarse oficialmente Real Club Deportivo de A Coruña (en castelán) e Real Club Deportivo da Coruña (en galego).
Nova etapa tamén na música
A actualización da identidade do club non se limita á súa denominación. Aproveitando este novo ciclo, o Deportivo traballa nunha nova versión do seu himno, que será composta polo músico coruñés Xoel López.
Segundo informou a propia entidade, a peza busca converterse nun elemento de unión para todo o deportivismo. O obxectivo é crear unha obra que conecte a historia do club coas futuras xeracións, servindo como “legado emocional” e expresión contemporánea da identidade branquiazul.
