A presidenta da Comunidade de Madrid, Isabel Díaz Ayuso, denunciou este martes unha falta total de protección durante a súa viaxe oficial a México a pasada semana. Segundo explicou nunha entrevista en Cadena Cope, tivo que interromper a súa xira de forma prematura e regresar a España ante o que cualificou como unha situación de “perigo extremo” pola que ninguén do Goberno central se interesou.
Ayuso cargou con dureza contra o presidente español, Pedro Sánchez, e a mandataria mexicana, Claudia Sheinbaum. Acusou ao Executivo estatal de deixar “á súa sorte” a unha representante do Estado nun país marcado polo “narcotráfico” e a violencia política. “Puidonos ter ocorrido calquera cousa en calquera sitio”, asegurou a dirixente madrileña.
Denuncia de boicot e ameazas
A presidenta madrileña reafirmouse na súa versión de que o goberno de Sheinbaum intentou boicotear a súa axenda. Segundo Ayuso, existiron ameazas de pechar o recinto dos Premios Platino se ela asistía, un extremo que tanto as autoridades mexicanas como a empresa propietaria do complexo negaron previamente.
A dirixente do PP insiste en que ten probas destas presións e vinculou a hostilidade do goberno mexicano ás súas declaracións sobre o mestizaje e figuras históricas como Hernán Cortés ou Isabel a Católica, aínda que defendeu que os seus discursos foron conciliadores.
Cancelación de actos e volta anticipada
A xira, que debía incluír unha visita a Monterrey e rematar este martes, quedou suspendida o pasado venres. Ayuso tamén sinalou a Sheinbaum por impedir un evento liderado polo músico Nacho Cano na Catedral Metropolitana, aínda que a Arquidiocese de México aclarou que a cancelación se debeu á falta de permisos de gravación por parte da produtora.
Pola súa banda, Pedro Sánchez evitou entrar na polémica este martes. O presidente do Goberno rexeitou responder ás acusacións ao considerar que Ayuso busca “crear problemas e confrontar” tanto no ámbito nacional como no internacional.
