O Instituto Nacional de Estatística fixo públicos este venres os datos de viaxeiros aloxados nos hoteis e pensións galegos durante o pasado mes, que constatan o avance cualitativo do turismo en Galicia.
As cifras constatan que Galicia afianza a súa desestacionalización con incrementos de viaxeiros, noites e rendibilidade fóra de temporada alta.
Deste xeito, coincidindo co mes do Entroido, os hoteis e pensións galegos rexistraron algo máis de 202.000 viaxeiros que fixeron máis de 364.000 noites, cifras que supoñen incrementos do 3% e de case o 4% respectivamente con respecto ao ano pasado.
