jueves, marzo 28, 2024
InicioComarcasLouriña115 ciclistas participan no Gran Premio Concello do Porriño

115 ciclistas participan no Gran Premio Concello do Porriño

O evento, organizado polo Club Master da Louriña, celébrase este sábado día 11 e puntúa para a Copa de Galicia

O Porriño será de novo epicentro do ciclismo galego co Gran Premio Concello do Porriño Élite e Sub-23 que organiza o Club Master da Louriña.

A proba presentouse nun acto no que estiveron presentes o alcalde, Alejandro Lorenzo, o concelleiro de Deportes, Abel Estévez, o presidente do Club Master da Louriña, Juan Álvarez, o xefe provincial de deportes, Daniel Benavides, o director técnico da Federación Galega de Ciclismo, Jacobo Ucha, e Rafael Pérez, de LASAL Cocinas, patrocinador do evento.

O alcalde, Alejandro Lorenzo, puxo en valor “o bo facer do Master da Louriña, un club que pensa en grande e sempre é garantía de éxito” polo que contan “co respaldo incondicional do Concello en todo o que se propoñan”.

No mesmo senso expresouse o concelleiro de Deportes, Abel Estévez, que destacou “o mimo que o club e todos os que o forman poñen en cada cousa que fan”. “O Master da Louriña é un selo de calidade que o Concello do Porriño ten que avalar e apoiar sempre”, concluíu. Un respaldo que se materializou no acordo de colaboración asinado entre ambas entidades.

Pola súa banda, o presidente do club organizador, Juan Álvarez, convidou a todo o mundo a desfrutar da proba “a tradicional e reclamada volta ao val”. Álvarez explicou que hai “115 ciclistas inscritos” que disputarán a carreira puntuable para a Copa de Galicia nun circuíto de 140 km. “Un dos puntos quentes será a meta volante, en Baiona, e destacar tamén o que chamamos a selección da carreira, un tramo que aínda que non conta cun gran desnivel si é un rompepernas”, dixo.

Jacobo Ucha, director deportivo da FGC eloxiou o traballo do club porriñés e destacou que se trata dunha proba “moi bonita, cun percorrido moi atractivo que terá ese triple paso pola Abelenda que esperamos abarrote as estradas co numeroso público amante do ciclismo que hai no Porriño”.

O representante de Deportes da Xunta, Daniel Benavides, “contento de que o deporte volva ser noticia no Concello do Deporte. Os que non somos do Porriño vimos a admirar o ben e o bo que se está facendo”, concluíu.

Tamén tivo unhas palabras de agradecemento o representante de LASAL Cocinas, “para aqueles que nos movemos na dualidade de ser patrocinador e afeccionado a este deporte é un pracer ver que os clubs contan tamén co respaldo das administracións” e como porriñés agradecer “a todos os que fan posible que o ciclismo retorne ao Porriño”.

ARTIGOS RELACIONADOS

+ POPULAR

COMENTARIOS RECENTES