Sumerxido na auga acabou o coche dun mozo veciño das proximidades de Marín, concretamente no peirao de Aguete. Tiña o freo de man mal posto e cando os dous ocupantes se percataron o automóbil xa entrara na auga.
O mozo meteu o vehículo na zona de servizo para embarcacións o martes pola noite. Con dúas persoas dentro e parado co freo de man mal posto (sen decatarse), o coche foi caendo cara á auga. As dúas persoas saíron ao darse conta pero o coche continuou afundíndose.
A parella de ocupantes non tivo máis remedio que marchar para casa esa noite e o coche quedou na auga ata o mércores pola mañá que conseguiron retiralo cun guindastre.
Existen prazas sinaladas para o aparcamento de coches e tamén sinalización que advirte de que esa rampla é unha zona de traballo coas prohibicións e advertencias que corresponde. Con todo os bañistas úsana con frecuencia e outras persoas, como este mozo, levan o coche ao espazo disposto para a entrada e saída de embarcacións do mar.
