A iniciativa tivo unha gran acollida no municipio completando axenda
O alcalde do Porriño, Alejandro Lorenzo, acompañado pola delegada territorial da Xunta en Vigo, Marta Fernández-Tapias, o director xeral de Maiores e Persoas con Discapacidade, Fernándo González Abeijón, e os concelleiros Abel Estévez, Rosario Costas e Carolina González, visitaron onte o autobús de Coidados Porta a Porta, que está a ofrecer servizos de podoloxía, audioloxía e estimulación da memoria ás persoas maiores da localidade xeito gratuíto.
Segundo informaron, as citas están completas todos os días que a unidade móbil permanecerá na vila, no aparcamento da piscina municipal.
“É unha iniciativa pioneira que aplaudimos chegue ao Porriño e que está a ter moita demanda”, explicou o alcalde. “Desde o Concello implicámonos especialmente na atención aos nosos maiores e en poñer á súa disposición todas as ferramentas que estean ao noso alcance para mellorar a súa calidade de vida”.
Neste sentido, cabe destacar que o novo executivo puxo en marcha a tal fin a Concellería de Terceira Idade, un departamento específico que traballa de maneira transversal co resto das áreas para dar resposta ás necesidades das persoas maiores e garantir que a localidade ofreza a calidade de vida que estes merecen
