O goberno local desminte o que califica de “infundadas” as denuncias dando a coñecer o deseño da xardineira autorizada pola Xunta.
Segundo o Concello de Ponteareas, a actuación no cruceiro da Praza Bugallal «conta coa autorización de Patrimonio». Así o fai saber a administración local mediante un comunicado no que lembra «que o proxecto de reforma da praza foi autorizado polo organismo da Xunta en outubro de 2019 e que, con carácter previo, se presentou especificamente o deseño da nova xardineira en cuxo interior se sitúa o cruceiro».
En canto á denuncia por parte do grupo de Alternativa Ciudadana de Ponteareas, o goberno local apunta que «refírese a que unha parte da base do elemento queda soterrada na zona axardinada» con todo «o deseño remitido a Patrimonio e autorizado por este, e agora feito público polo Concello, xa o contemplaba exactamente así».
Explican tamén que «os proxectistas e a dirección de obra confirmaron ademais que esa xardineira está correctamente executada de acordo co proxecto e co deseño que foi autorizado pola Xunta de Galicia».
O bipartito, no comunicado, lembra que «todos os grupos políticos teñen acceso ao expediente completo da obra e poden comprobar os permisos cos que conta, así como a definición técnica de calquera aspecto da obra» e que, por este motivo, o Goberno municipal «pide rigor e que non se fagan denuncias sen fundamento,
nas que se falta á verdade».
Escoita a entrevista co concelleiro Roberto Mera:
