O presidente da Xunta, Alfonso Rueda, deixou clara a súa postura ante a decisión da Comunidade de Madrid de limitar o acceso ao abono de transporte público aos seus residentes empadronados. Segundo advertiu o líder do Executivo galego, se Madrid segue adiante co seu plan —o que deixaría fóra aos galegos que viven, traballan ou estudan alí sen mudar o seu empadroamento—, Galicia aplicará “unha medida recíproca exacta”.
Rueda, que non desbotou chegar a un acordo mediante convenio, amosou o seu desgusto polo precedente que abre esta decisión, definida por el mesmo como sorprendente nunha rexión que ten por “aberta”. “Somos un país aberto e preferiría non ter que facer estas propostas, pero se temos que facelo imos esixir reciprocidade”, recalcou o presidente, abrindo a porta a cobrar aos cidadáns madrileños que empreguen servizos de transporte en Galicia.
Fronte aberta na atención a empresas
Ademais da cuestión do transporte, a Xunta mantén aberto outro contencioso co goberno de Isabel Díaz Ayuso. O Executivo galego está a asesorar aos empresarios de Galicia sancionados pola Comunidade de Madrid por supostos incumprimentos na normativa de comercio electrónico. Segundo Rueda, a estes afectados “asístelles a razón” ante as multas recibidas, algunhas delas de contía elevada e impostas sen aviso previo.
Relacións cordiais pese ás diverxencias
A pesar destes desencontros, Rueda subliñou que entre ambas as comunidades existen “relacións cordiais”. O presidente recoñeceu a importancia do fluxo de poboación entre ambos territorios e a presenza de galegos en Madrid e madrileños en Galicia, pero insistiu en que a súa obriga é “defender os intereses dos galegos”.
“Se temos que facer un desembolso, o lóxico é que os madrileños tamén o fagan polos servizos que dependen dos orzamentos de Galicia”, sentenciou, marcando así unha postura firme ante a estratexia da presidenta madrileña, que busca que as comunidades asinen convenios para cubrir o gasto dos seus cidadáns na capital.
