O mapa aeroportuario de Galicia pechou o primeiro cuadrimestre de 2026 cun balance de case 1,4 millóns de pasaxeiros e máis de 14.000 operacións. Os datos publicados este martes amosan unha evolución moi desigual: mentres as terminais da Coruña e Vigo medran con forza, o aeroporto de Santiago sofre unha caída notable debido aos traballos de mellora na súa pista.
Alvedro e Peinador despegan en abril
O aeroporto da Coruña-Alvedro liderou o crecemento no mes de abril con 134.135 pasaxeiros, o que supón un incremento do 25,4%. En canto ás operacións, a terminal coruñesa rexistrou 1.632 voos, subindo un 27,6% respecto ao ano anterior. No acumulado do ano, Alvedro xa suma preto de 448.000 viaxeiros.
Pola súa banda, Vigo-Peinador tamén mantén a tendencia positiva. En abril recibiu 98.250 usuarios, un 13,7% máis, e as operacións disparáronse un 36% ata acadar os 1.201 voos. No que vai de ano, a terminal viguesa supera xa os 336.000 pasaxeiros.
Santiago nota o impacto das obras na pista
A cara amarga dos datos de Aena atópase no aeroporto Santiago-Rosalía de Castro. A terminal compostelá pechou o cuadrimestre con 599.956 viaxeiros, o que representa un descenso do 33,6%. O impacto foi especialmente severo en abril, cunha caída do 42,3% en pasaxeiros e do 45,5% en voos.
Este esborralle nas estatísticas explícase polo peche operativo das instalacións entre o 23 de abril e o 28 de maio. Durante este período, Lavacolla acometeu obras de pavimentación da pista de aterraxe e a renovación do sistema de axuda á navegación ILS.
Malia as restricións, Santiago rexistrou en abril 1.120 voos comerciais, dos cales 804 foron nacionais e 316 internacionais, mantendo o seu peso como principal porta de entrada para as conexións de fóra de España.
