O Concello de Arbo iniciará unha serie de melloras no Centro de Interpretación do Viño e a Lamprea, coñecido como Museo Arabo, co obxectivo de reforzar a súa función como espazo de conservación e divulgación da historia e tradicións do municipio.
As obras, que abarcan tanto o interior como o exterior do edificio, contribuirán a modernizar e enriquecer a experiencia de veciños e visitantes, mantendo viva a memoria cultural da comarca. As reformas incluirán traballos de pintura, carpintería e albañilería, ademais da incorporación de novos apeiros vitivinícolas e unha exposición actualizada sobre o traballo do liño en Arbo. O investimento total ascende a 40.000 euros, financiados con fondos propios do Concello.
Así mesmo, asinouse un convenio coa Deputación de Pontevedra para dotar ao museo de novos elementos, entre os que se atopan o cambio de paneis na zona dedicada ao viño e a incorporación dun vídeo promocional que difunde os recursos turísticos de Arbo. Esta acción, por valor de 17.970 euros, pretende fortalecer a promoción do patrimonio do
municipio e atraer a un público máis amplo.
“Estas obras constitúen un paso importante para poñer en valor a nosa historia e tradicións, fomentando o coñecemento e o recoñecemento de Arbo como referente no ámbito cultural e turístico,” comentou o alcalde do municipio, Horacio Gil.
Doutra banda, o Museo Arabo recibirá unha achega adicional financiada pola Xunta de Galicia, consistente na incorporación dun novo vídeo sobre o ciclo vital da lamprea. Este material didáctico permitirá comprender mellor as peculiaridades deste peixe, tan ligado ás tradicións gastronómicas e culturais da zona. O vídeo estará situado na Planta da Lamprea, complementando a exposición e enriquecendo a oferta do centro.
O edificio permanecerá pechado do 15 de outubro ao 26 de novembro co fin de acometer as distintas obras de mellora.
