A Asociación Lazoiro de Salvaterra de Miño vén de denunciar nun comunicado de prensa o estado das árbores da vila onde aseguran que «gran parte do arborado está en risco de caída«.
A agrupación asegura que o Concello de Salvaterra «talou numerosas árbores no centro da vila, que non foron substituídas, quedando en moitas ocasións parte dos troncos durante longos periodos».
A maiores desta problemática, a asociación contabilizou no centro do municipio «máis de 20 localizacións onde antes había árbores e agora foron directamente substituídas por baldosas, suprimindo así zonas de sombra e facendo por tanto que as rúas alcanzen temperaturas máis elevadas».
Ao tempo, dende Lazoiro solicitan tamén que «se supriman as prácticas de mantenento habituais deste Concello na xestión das árbores e arbustos» onde aseguran que «prima unha poda excesivamente agresiva«.
