Ponteareas converte os xardíns da Xiralda nun gran salón de lectura coa nova edición da Feira do Libro

Ponteareas prepárase para unha nova edición da súa Feira do Libro, un evento cultural que, ao longo de catro días, encherá de vida e literatura os Xardíns da Xiralda. Dende o xoves 10 ao domingo 13 de xullo, a vila converterase nun punto de encontro para amantes da lectura e autores, con vendas de libros, sinaturas, presentacións e música.

A Feira do Libro de Ponteareas, impulsada polo Concello, busca promover o hábito da lectura en persoas de todas as idades e «achegar a unha gran variedade de libros, moitos dos cales non sempre están dispoñibles en librerías comúns», segundo explican desde o Concello. Ademais, permite que os lectores coñezan directamente a escritores, participen en firmas de libros e asistan a presentacións.

A alcaldesa, Nava Castro, salienta a importancia destas feiras porque «humanizan a figura do autor e fortalecen o vínculo coa obra», ademais de dar visibilidade ás editoriais e promover o encontro comercial nun ambiente festivo con actividades artísticas e música.

Horarios da Feira do Libro de Ponteareas 2025

A feira abrirá cada día a partir das 12:00 horas, agás o primeiro día, xoves 10 de xullo, que arrancará ás 18:00 horas. A inauguración oficial terá lugar ese mesmo xoves ás 20:00 horas, co pregón a cargo de Rafael Rodríguez “Rafita”, acompañado de música. A continuación, presentarase “Galegas na música” de Isabel Blanco.

Programación da Feira do Libro de Ponteareas

• Venres 11 de xullo: A xornada comezará ás 12:00 horas con xogos tradicionais na contorna da feira. Pola tarde, a partir das 18:00 horas, sucederanse de hora en hora as presentacións con autores e autoras como Xesús Constela, María Besteiros, Nieves Rodríguez e Pedro Feijóo.
• Sábado 12 de xullo: Haberá xogos tradicionais e ás 13:00 horas a performance “Mala letra en mi libreta” de Javier Santalices con Tamara Barrasa e David Barros. Pola tarde, ás 18:00 horas, presentarase a colección “Nomes dos lugares, patrimonio e historia” de Arístides Carrera. Ás 19:00 horas, será a presentación de “Bonecas” de Raquel Castro. O punto central do día será ás 20:00 horas a presentación de “Seraogna, 50 anos”, unha edición especial conmemorativa da obra de Alfonso Pexegueiro, coa participación de Paula Domínguez e Fátima Ferreiro e unha lectura pública que renderá homenaxe ao recoñecido poeta.
• Domingo 13 de xullo: A xornada comezará ás 12:00 horas cun obradoiro de ilustración “Deseña o teu superheroe” a cargo de Iria Fernández. Pola tarde, ás 18:00 e 19:00 horas, terán lugar as presentacións das últimas obras de Carlos Callón e Diego Giráldez. Ás 20:00 horas, o público poderá gozar do recital poético “Concerto para flores” de Samuel Merino. A clausura da feira será ás 21:00 horas, tras a presentación da obra “Lírica medieval. Xoán García de Guillade e Martín de Xinzo” de Manrique Fernández.

A Feira do Libro contará coa participación do director xeral de Cultura, Anxo Lorenzo, e da deputada de Igualdade e Benestar Social, Sandra Bastos.