Un mozo de 28 anos faleceu esta madrugada nun accidente de tráfico ao saír da vía co seu vehículo e chocar contra o muro dunha casa na Pobra do Caramiñal. Segundo informou a Garda Civil, os primeiros indicios apuntan a que non levaba posto o cinturón de seguridade.
O 112 Galicia recibiu a alerta en torno ás 1:20 horas a través dun particular, quen alertou do choque dun turismo contra o muro dunha vivenda no quilómetro 31 da AC-305, á altura de Posmarcos. Na chamada informou que había unha persoa no interior do vehículo, posiblemente atrapada.
Ata o lugar desprazáronse os Bombeiros de Boiro e Ribeira, que retiraron á persoa do interior do vehículo, sen necesidade de ser excarcelada. Os servizos sanitarios, tamén alí presentes, practicáronlle manobras de reanimación mais non puideron facer nada pola súa vida. Ao lugar do sinistro achegáronse, ademais dos Bombeiros de Boiro e Ribeira e Urxencias Sanitarias de Galicia – 061; Garda Civil de Tráfico, voluntarios de Protección Civil da Pobra do Caramiñal e os servizos de mantemento de estrada.
