O Concello de Ponteareas abriu o prazo de inscrición para a adxudicación dos postos de venda, exposición e gastronomía de cara a unha nova edición da “Feira Tradicional dos Remedios”, prevista para o 5 de setembro e promovida dende a concellería de Cultura.
Esta romaría e feira tradicional, que congrega anualmente a miles de visitantes no casco urbano da vila, destaca pola súa fidedigna recreación do ambiente comercial de principios do século XX. Co fin de preservar dita identidade cultural, as bases publicadas polo consistorio estipulan pautas estritas sobre a estética dos postos portátiles e a idoneidade dos produtos ofertados. O deseño e ordenación do mercado contempla varias modalidades de participación para os profesionais interesados, incluíndo artesanía tradicional galega, produtos ecolóxicos e tabernas gastronómicas.
Normas obrigatorias
Para garantir o correcto desenvolvemento do mercado e o respecto absoluto pola contorna histórica, o Concello de Ponteareas esixe o cumprimento estrito dunha serie de condicións obrigatorias recollidas de forma íntegra na normativa municipal. En primeiro lugar, establécese a obrigatoriedade da caracterización estética e a vestimenta de época, o que implica que todos os comerciantes e o persoal de atención ao público deben acudir con traxes tradicionais galegos ou roupa propia de principios do século pasado, quedando totalmente prohibidas as prendas de estética moderna visible.
Así mesmo, a decoración das estruturas e mostradores portátiles debe realizarse exclusivamente con materiais naturais como madeira, tea de palla, bimbio ou elementos vexetais, ocultando calquera compoñente plástico o metálico contemporáneo. No plano administrativo, os solicitantes teñen que achegar a documentación básica que inclúe a copia do DNI ou CIF, o xustificante de estar ao corrente das súas obrigas coa Seguridade Social e Facenda, e a acreditación de alta no réxime fiscal correspondente á actividade comercial.
Tamén resulta indispensable a presentación dunha póliza de seguro de responsabilidade civil vixente que cubra calquera tipo de continxencia durante os días de montaxe, celebración e desmontaxe do evento. Pola súa banda, os postos dedicados á alimentación e á restauración deben cumprir rigorosamente coa normativa hixiénico-sanitaria vixente, contar co carné de manipulador de alimentos e achegar unha declaración responsable sobre a procedencia dos produtos.
Finalmente, as bases esixen adxuntar unha ficha técnica detallada do posto onde consten as medidas exactas da instalación xunto a fotografías recentes, tanto da estrutura montada como dos artigos que se porán á venda.
Solicitudes telemáticas
Para formalizar a inscrición, as persoas físicas, xurídicas ou asociacións interesadas deberán tramitar a súa solicitude de forma preferente por vía telemática a través da sede electrónica do Concello de Ponteareas, ou ben de forma presencial, acudindo ao Rexistro Xeral do consistorio baixo o sistema de cita previa.
Desde o Goberno local animan “a todo o tecido artesán, produtor e hostaleiro da comarca do Condado e de toda Galicia a sumarse activamente a esta convocatoria”.
