Xabier Ron Fernández, ex-deputado no Parlamento galego con Alternativa Galega de Esquerda (AGE), foi condenado a nove anos e medio de prisión tras declararse culpable dun delito de agresión sexual a unha menor que fora alumna súa. A resolución, ditada pola Audiencia Provincial de Santiago, inclúe ademais unha orde de afastamento da vítima de 19 anos e medio e dez anos de liberdade vixiada unha vez que abandone o centro penal.
Os feitos, que o acusado recoñeceu antes mesmo de chegar a xuízo, tiveron lugar entre xullo e novembro de 2024. Segundo recolle o fallo xudicial, Ron aproveitou a súa condición de profesor e a relación de confianza xerada para provocar unha dependencia emocional na menor, que entón tiña 12 anos. Nese período producíronse as agresións sexuais polas que, ademais, a nena resultou contaxiada dunha enfermidade de transmisión sexual.
Probas determinantes
A contundencia das probas reunidas pola Garda Civil, que incluían mensaxes de texto, audio e vídeo, foi decisiva para que a defensa do acusado optase pola confesión. Ron levaba xa un ano en prisión provisional desde a súa detención en xaneiro de 2025, tempo durante o cal a Audiencia rexeitou a súa saída en liberdade ante o risco de fuga e de destrución de probas.
Como medida complementaria á pena de cárcere, o tribunal impuxo ao condenado a inhabilitación absoluta para calquera actividade laboral, remunerada ou non, que implique contacto con menores durante os próximos 15 anos.
Traxectoria política e profesional
Xabier Ron foi deputado na Cámara galega tras as eleccións de 2012 e tamén encabezou a candidatura de Esquerda Unida á alcaldía de Santiago. Tras o seu arresto, a formación política desvinculouse del, sinalando que xa non formaba parte dos seus órganos de dirección desde facía oito anos. No momento da súa detención, o condenado exercía como profesor nun instituto de Pontedeume, tras ter impartido docencia anteriormente noutros centros de Ames e Touro.
