O xuíz da Audiencia Nacional, Santiago Pedraz, decidiu imputar a actual presidenta da Sociedade Estatal de Participacións Industriais (SEPI), Belén Gualda, e a máis dunha vintena de responsables de entes públicos, entre eles membros vinculados a Enusa. O maxistrado accede así á petición da Fiscalía Anticorrupción, que busca aclarar as presuntas irregularidades na concesión e seguimento de contratos públicos asociados á trama que lidera Leire Díez.
Esta decisión abre un novo escenario na investigación sobre a rede que operaba arredor da exmilitante socialista e o expresidente da SEPI, Vicente Fernández Guerrero. A causa céntrase nas supostas manobras en adxudicacións, expedientes e rescates que involucraron a diversas sociedades estatais.
O foco, o rescate de Tubos Reunidos
A principal liña de investigación nesta nova derivada apunta ao rescate público de 112,8 millóns de euros concedido á compañía vasca Tubos Reunidos a través do Fondo de Apoyo a la Solvencia de Empresas Estratégicas, xestionado pola SEPI durante a pandemia.
Segundo a Fiscalía, a presidenta da SEPI tería comprometido co CEO da empresa, Francisco Vicente Irastuza, a aprobación dunha solicitude específica relacionada con este rescate por parte do consello asesor do fondo. A investigación rastrea agora as condicións de devolución do préstamo e un polémico aplazamento dunha amortización vinculada á venda dun inmoble en Sestao.
Unha causa que medra
A imputación de Gualda amplía significativamente o alcance institucional deste caso, que ata o de agora sinalaba principalmente a intermediarios e antigos cargos vinculados á SEPI. O xuíz Pedraz, que instrúe o caso no Xulgado Central de Instrucción número 5 da Audiencia Nacional, xa requirira anteriormente abundante documentación á sociedade estatal sobre correos electrónicos, carpetas dixitais e expedientes relacionados con Tubos Reunidos.
A decisión xudicial baséase nun novo atestado da UCO que revelou a existencia de “novos investigados e novos feitos”. A trama, que segue analizando dispositivos e documentación intervidos en máis dunha ducia de rexistros, abrangue tamén outras liñas de investigación como manobras para desacreditar investigadores de causas sensibles e supostos contactos irregulares con sectores da Fiscalía.
