A angustia que rodeaba a desaparición dunha familia de Marín en Venezuela empezou a disiparse, aínda que a incerteza persiste. Yhosvany Hernández, fillo maior da familia e residente en Florida, confirmou que os seus pais e os seus dous irmáns están vivos. Segundo explicou, a información provén de listados aos que tivo acceso, pero polo momento non existe unha ratificación oficial nin se coñece en que refuxio ou centro hospitalario se atopan exactamente.
A familia, con forte arraigo en Marín —onde os nenos estaban escolarizados e o pai exercía como adestrador no Marinenses Hockey Club—, viaxara a La Guaira tras rematar o curso escolar para visitar os seus seres queridos. Esta localidade venezolana foi o epicentro da catástrofe, que contabiliza xa máis de 920 falecidos e 3.360 feridos.
Mobilización e apoio en Marín
Desde que se coñeceu a desaparición, a comunidade de Marín volcouse coa familia. O Concello, encabezado pola alcaldesa María Ramallo, mantén contacto con organismos oficiais para intentar obter información precisa nunha situación que a propia rexedora cualificou de “caótica”. Por parte do Colexio La Inmaculada, onde estudan os menores, a comunidade educativa expresou o seu apoio incondicional, enviando mensaxes de ánimo e acompañamento aos achegados durante este proceso tan difícil.
Para canalizar a solidariedade local, a administración municipal convocou un minuto de silencio o pasado luns, un xesto ao que se sumou tamén a Deputación de Pontevedra, que gardou outro minuto de silencio en memoria das vítimas antes do pleno deste venres.
Asovedra habilita axudas para os damnificados
A Asociación de Venezolanos en Pontevedra (Asovedra) está a xestionar unha avalancha de consultas de residentes na comarca que buscan noticias dos seus familiares no país. O seu presidente, Manuel Osorio, sinalou que a situación de angustia é “inmensa” e fixo un chamamento á colaboración cidadá.
Para axudar nas labores de rescate e atención médica, a asociación activou unha conta bancaria solidaria (IBAN: ES15 0049 6766 83 2010046761) para recadar fondos que permitan cubrir as necesidades máis urxentes en Venezuela. Osorio explicou que esta é a primeira fase dun plan de axuda que pretende ampliar máis adiante cunha recollida de alimentos e medicamentos, sempre que a loxística o permita.
