Máis de 15 vivendas do barrio da Lomba, na parroquia de Areas de Ponteareas, permanecen sen servizo de internet desde hai xa quince días debido a unha incidencia na rede de fibra óptica que afecta a un poste situado nunha propiedade privada. Os veciños denuncian a falta de solucións por parte de Telefónica e aseguran que as distintas compañías coas que teñen contratados os seus servizos remítenos continuamente a esta empresa.
Os afectados explican que o problema non reside na negativa de acceso á finca, senón no mal estado do cableado. Segundo indican, parte dos cables atópanse deteriorados e mesmo fóra da caixa de conexións, unha situación cuxa reparación corresponde a Telefónica como propietaria da infraestrutura.
Durante as últimas semanas, os veciños presentaron reclamacións ante as súas respectivas operadoras, entre elas Movistar e Orange, sen obter unha solución definitiva. Segundo relatan, as compañías asegúranlles que a incidencia depende da rede de Telefónica e que non poden actuar directamente sobre ela. “Din que van enviar a alguén, pero ninguén aparece”, lamentan algúns dos afectados.
A falta de conexión está a provocar trastornos no día a día dos residentes, especialmente entre aquelas persoas que teletraballan ou dependen de internet para desenvolver a súa actividade profesional.
Pola súa banda, o propietario da finca onde se atopa o poste asegura que nunca se opuxo a que se preste servizo aos veciños, pero reclama desde hai anos unha reubicación do poste fóra da súa propiedade, ou cando menos “pegado ao muro, de forma que non entorpeza”. Ademais, asegura que xa solicitou en varias ocasións a Telefónica que desprazase ou elevase o tendido para evitar problemas.
Segundo a súa versión, durante traballos realizados na zona para a corta de árbores producíronse danos e resultaron afectados algúns cables da rede. A maiores, o propietario afirma que nunca foi indemnizado polos prexuízos ocasionados de ter o poste na súa propiedade e considera que a solución pasa por trasladar o poste uns metros, ben cara ao muro da parcela ou cara a unha zona próxima á estrada nacional.
Mentres o conflito continúa sen resolverse, as máis de 15 familias afectadas seguen sen acceso a internet e reclaman unha intervención urxente de Telefónica para reparar a infraestrutura e restablecer o servizo canto antes.
