O Ministerio de Vivenda, a través da entidade estatal Casa 47, realizou este xoves o sorteo de 67 pisos de aluguer accesible en Vigo. Estas vivendas, procedentes da Sareb, teñen unha superficie media de 79 metros cadrados e un prezo medio de 662 euros ao mes. A promoción recibiu un interese masivo, xa que entre Valencia e a cidade olívica sumaron 6.715 solicitudes.
Aínda que o Goberno central destaca que estas rendas están un 35 % por baixo do mercado libre, os datos do Observatorio da Vivenda da Xunta matizan esta cifra. Segundo o organismo autonómico, o aluguer medio en Vigo sitúase en 721 euros, polo que a diferenza real coa promoción de Casa 47 sería do 9 %.
Un proceso ante notario e contratos de longa duración
O sorteo levouse a cabo mediante un sistema informático do Consello Xeral do Notariado para asegurar a transparencia. O resultado publicaráse proximamente na web de Casa 47. A partir de agora, a entidade iniciará a comprobación dos requisitos das persoas seleccionadas, que deben ter nacionalidade española ou residencia legal, ingresos de entre 2 e 7,5 veces o IPREM e non ter vivenda propia.
As persoas adxudicatarias poderán asinar contratos de ata 75 anos. O primeiro período será de 14 anos, con prórrogas automáticas cada sete anos, sempre que se verifique que os inquilinos seguen cumprindo as condicións de acceso.
Contrastes no prezo do aluguer
A iniciativa Casa 47 busca ofrecer alternativas habitacionais por debaixo dos prezos habituais. Nesta promoción concreta de Vigo, destacan vivendas como estudos con terraza en plena Gran Vía. O Ministerio defende que o prezo medio de 662 euros facilita o acceso á vivenda, malia que o contraste coas estatísticas oficiais da Xunta de Galicia reduciu a fenda de aforro respecto á media da cidade.
