A Xunta de Galicia iniciou hoxe os trámites para elaborar a que será a primeira Lei de saúde pública da comunidade. O presidente do Executivo, Alfonso Rueda, anunciou tras o Consello da Xunta que o obxectivo é modernizar un marco normativo que quedara atrás tras case 20 anos, para adaptarse a desafíos como o cambio climático, a dixitalización ou o envellecemento da poboación.
A futura norma busca, en palabras de Rueda, “reducir a incidencia de enfermidades” e optimizar a reacción ante alertas sanitarias. Segundo indicou o presidente, a experiencia da pandemia da covid puxo de manifesto a necesidade “imprescindible” de contar cunha regulación específica que reforce a vixilancia epidemiolóxica e a resposta temperá.
“Saúde en todas as políticas”
O conselleiro de Sanidade, Antonio Gómez Caamaño, explicou que a lei adoptará unha visión integral. Baixo o concepto de “unha soa saúde”, a normativa unificará a protección da saúde humana, animal e ambiental. O obxectivo é que calquera actuación pública, sexa do sector que sexa, teña en conta o seu impacto no benestar da cidadanía.
Entre os puntos clave que regulará a lei destacan:
- A promoción de estilos de vida saudables, como a alimentación e a actividade física.
- A prevención de condutas adictivas e o coidado do benestar emocional.
- A protección fronte a riscos ambientais e alimentarios.
- A creación de contornas saudables en colexios e centros de traballo.
Consulta pública e prazos
O Goberno galego abriu hoxe mesmo un proceso de consulta pública no Portal de Transparencia para que a cidadanía e os axentes implicados poidan realizar achegas ao texto. A previsión da Xunta é que a normativa estea redactada e se remita ao Parlamento para a súa aprobación a principios do próximo ano 2026.
Con esta nova ferramenta, a administración autonómica pretende gañar eficiencia no uso dos recursos públicos e garantir a equidade territorial, especialmente ante retos como a dispersión xeográfica de Galicia.
Podes escoitar os detalles da futura lei nas declaracións do presidente da Xunta, Alfonso Rueda no seguinte audio:
