domingo, mayo 19, 2024
InicioNewsSucesosO TSXG confirma a condena de catro anos e medio de cárcere...

O TSXG confirma a condena de catro anos e medio de cárcere imposta a un avó por abusar sexualmente da súa neta

A Sala do Civil e Penal do Tribunal Superior de Xustiza de Galicia (TSXG) confirmou a sentenza da sección segunda da Audiencia Provincial de Ourense que condenou a catro anos e seis meses de cárcere a un avó por abusar sexualmente da súa neta menor de idade, aproveitando que as fins de semana pernoitaba na súa casa

Os maxistrados salientan que “ningunha situación de indefensión se creou polo feito de que a defensa do acusado non participase directamente na confección do informe de credibilidade” da menor. Polo tanto, rexeitan un dos argumentos do recurso do sospeitoso, quen alegou que se vulnerou o seu dereito a un proceso con todas as garantías. Así, indican que non poden admitir “que a parte non tivese ocasión de cuestionar o contido da dilixencia sumarial de credibilidade do testemuño da menor”, pois “nada impediu a posible elaboración dun contrainforme que cuestionase o elaborado polo IMELGA, nin tampouco se impediu á defensa cuestionar dalgún modo o contido do informe discutido, con pleno respecto ao principio de contradición”. A Sala nega na resolución que se cernase algún “dereito da defensa por non participar no desenvolvemento do informe, nas dilixencias ou actuacións preliminares do mesmo”.

O TSXG tamén rexeita o segundo motivo do recurso, no que o condenado cuestiona o relato da vítima, ao que non atribúe forza probatoria. “As pretendidas imprecisións nos testemuños da menor de ningún xeito embazan o criterio adoptado sobre a realidade dos tocamentos do pene, mesmo, como sinala reiterada xurisprudencia, esas supostas contradicións ou imprecisións non fan máis que corroborar a veracidade do testemuño, eludindo considerar que se trata dun relato aprendido e configurado desde a irrealidade”, recalca a Sala na sentenza. Ademais, indica que a demora na denuncia dos feitos “de ningún xeito supón afectación á veracidade do testemuño” da vítima.

Por último, os xuíces rexeitan a posibilidade -exposta pola defensa- de que os feitos se considerasen como unha falta de vexacións, pois lembran que ese tipo desapareceu no ano 2015. En canto á aplicación da agravante de parentesco cuestionada pola defensa, o alto tribunal galego asegura que é “evidente” que, neste caso, “existe unha notoria situación de desnivel entre o avó e a súa neta, que esa situación é certamente aproveitada polo primeiro para a realización dos actos de abuso, que o propio parentesco e a convivencia creada e derivada do mesmo é o que facilita a comisión do ilícito penal e, finalmente, que por todo iso a posición do acusado en relación coa menor resulta eficaz para a comisión do delito”

ARTIGOS RELACIONADOS

+ POPULAR

COMENTARIOS RECENTES