A sección segunda da Audiencia Provincial de Ourense condena a seis anos e medio de cárcere a un home por violar a unha muller na súa casa do Barco de Valdeorras. Ademais da pena de prisión, a Sala impúxolle a prohibición de comunicarse por calquera medio coa vítima e de aproximarse a ela durante oito anos.
O tribunal considera probado que a prexudicada, amiga dunha amiga do procesado, subiu durante a madrugada do 11 de setembro de 2021 ao piso do acusado para non quedar soa e esperar a que regresase a súa amiga, co obxectivo de irse a durmir á súa casa.
Os xuíces relatan na sentenza que, debido a que se levantou moi cedo, estivera traballando todo o día e consumira gran cantidade de bebidas alcohólicas, mostrouse sumamente fatigada e mareada, polo que o procesado ofreceuse a realizarlle unha masaxe, dicíndolle que era fisioterapeuta, e levouna á súa habitación. Durante a masaxe, segundo o fallo, a vítima quedou durmida e en estado de seminconsciencia, o que aproveitou o condenado para violala. “Mentres isto ocorría, a afectada tivo algún momento de lucidez no que lle dicía ao procesado que parase, que lle doía e que non quería, facendo este caso omiso”, indican os maxistrados.
Ademais, salientan na resolución, contra a que cabe presentar recurso ante o TSXG, que como consecuencia das lesións que sufriu, a vítima precisou para a súa curación de varias asistencias facultativas. A Audiencia explica na resolución que a declaración da vítima resulta “proba de cargo suficiente para estimar acreditada a existencia do delito de abuso sexual obxecto de denuncia”, á vez que recalca que está corroborada polas declaracións de varias testemuñas e polo resultado da pericial practicada, tanto polo médico forense como polas dúas psiquiatras.
