O Concello do Porriño, EUC de A Granxa, AE As Gándaras, Acipor e Xunta de Galicia celebraron hoxe este encontro no que participou medio cento de empresas do Porriño
O Centro de Iniciativa Empresarial A Granxa foi a sede esta mañá do networking entre o empresariado porriñés, Concello do Porriño e Xunta de Galicia convocado co obxectivo de afondar no mapa de axudas de IGAPE e INEGA e as posibilidades que estas ofrecen para mellorar a competitividade do tecido empresarial do Porriño.
No encontro presidido polo presidente da EUC A Granxa, Indalecio Cuevas, e o alcalde do Porriño, Alejandro Lorenzo, interviñeron o director xeral do Instituto Galego de Promoción Económica, Fernando Guldrís, e o director do departamento de Enerxía do Instituto Enerxético de Galicia, Juan Rodríguez.
O alcalde puxo en valor encontros como este, “necesarios para establecer esa sinerxía entre as administracións e o tecido empresarial que permita impulsar os nosos polígonos industriais e facelos máis competitivos e sostibles”. O rexedor quixo agradecer “a iniciativa e disposición das asociacións de empresarios a establecer estes lazos de traballo” e adiantou “que este encontro será o primeiro de moitos”.
