A polémica pola posible activación da primeira mina submarina de area fosfática do mundo, o coñecido como proxecto Sandpiper, sitúase no seu momento máis crítico. A presidenta de Namibia, Netumbo Nandi-Ndaitwah, manifestou a súa firme oposición á luz verde ambiental outorgada recentemente á iniciativa. Con esta postura, a mandataria convértese nunha aliada clave para a industria pesqueira galega asentada no país africano e para as organizacións ecoloxistas, que levan tempo advertindo dos graves efectos que a extracción terá no medio mariño.
Segundo publicou The Namibian, o principal xornal do país, a presidenta e outros altos cargos do Goberno están profundamente anoxados co Comisionado de Medio Ambiente por emitir o certificado sen unha consulta previa, tratándose dun asunto de enorme interese público. Nandi-Ndaitwah, que hai poucos meses visitou varias instalacións pesqueiras de capital vigués na zona, rexeita frontalmente que a empresa Namibian Marine Phosphate utilice as augas do país para probar este sistema e o Executivo xa busca tomar medidas contra os funcionarios que autorizaron a operación.
A mina submarina está proxectada para abarcar unha área de ata 2.234 quilómetros cadrados, a escasas 75 millas do porto de Walvis Bay. Ante a ameaza que isto supón para o ecosistema e a viabilidade da pesca, a patronal local, a Confederation of Namibian Fishing Associations (CNFA), xa moveu ficha. A organización anunciou a presentación dun recurso contra o «ok» ambiental e instou á ministra de Medio Ambiente e Turismo, Indileni Daniel, a revogar o permiso de forma inmediata.
