O veciño de Salceda de Caselas de 34 anos que era buscado desde o pasado 23 de xullo entregouse este mércores no cuartel da Garda Civil de O Porriño. O arrestado personouse ás 10.15 horas acompañado dun letrado ao saber que constaba sobre el unha orde de busca como presunto autor da embestida contra un coche patrulla da Policía Local durante unha persecución. Tras pasar a disposición xudicial, o xulgado de garda decretou a súa liberdade provisional, enfrontándose a cargos por atentado contra a autoridade, danos, dous delitos de lesións e outros dous contra a seguridade viaria.
Os feitos retónanse a finais de xullo, cando os axentes municipais deron o alto a un todoterreo no centro da vila pontevedresa. O condutor fuxiu e iniciou unha persecución dende a rúa Vigo ata o barrio de Maceira, en Parderrubias, momento no que o sospeitoso detivo o vehículo de súpeto e embistiu marcha atrás contra o coche patrulla. A colisión provocou danos considerables no vehículo policial e feridas aos dous axentes que o ocupaban, os cales precisaron asistencia médica. Segundo informou a Garda Civil, o arrestado conta cun extenso historial de antecedentes delituosos.
