A Xunta de Galicia reforzou os medios do Grupo de Apoio Loxístico (GALI) da Axencia Galega de Emerxencias (Axega) coa incorporación dun robot de intervención con control remoto e dun dron subacuático. Tal e como informou o Goberno galego, estas novas ferramentas tecnolóxicas están deseñadas para mellorar a capacidade de actuación en incendios e outras situacións complexas. O conselleiro de Presidencia, Xustiza e Deportes, Diego Calvo, acompañado polo xerente da Axega, Marcos Araújo, puido comprobar de primeira man o funcionamento destes equipos nunha demostración práctica.
O novo robot portaherramientas está preparado para tarefas de extinción e rescate en zonas de acceso complicado. A súa configuración permítelle operar en condicións adversas de auga, po ou proxeccións materiais e desprazarse por fortes pendentes ou terraplenes, ofrecendo ademais protección aos equipos de intervención mediante unha cortina de auga e a capacidade de realizar ataque directo ás lapas. Pola súa banda, o dron subacuático está dotado dun brazo articulado e pode realizar buscas en augas interiores de ata 300 metros de profundidade, colaborando tamén na localización de obxectivos para investigacións xunto coa Garda Civil e a Policía Nacional. Ambos os dispositivos prevén incorporar novas tecnoloxías de imaxe e sensores no futuro para ampliar as súas prestacións operativas.
