A xornada de partido da selección española transcorre en Vigo marcada pola confrontación entre o Concello e a Deputación de Pontevedra. A Policía Local precintou este venres a pantalla xigante que o ente provincial instalara na Praza da Estrela, un espazo que, ao estar en terreo portuario, depende da Xunta. O goberno local, liderado polo socialista Abel Caballero, xustifica a medida pola falta de autorización municipal e incumprimento da lexislación vixente en materia de seguridade.
A vicepresidenta da Deputación, Luisa Sánchez (PP), cargou duramente contra esta decisión, calificándoa de «insólita» e de «sectarismo político». Sánchez sostén que a negativa municipal responde unicamente a que a iniciativa parte dunha administración gobernada polos populares e non polo Concello. «O seu nerviosismo é cada vez máis notorio; quere monopolizar calquera asunto», denunciou a portavoz popular, quen asegurou que toda a documentación requirida xa fora presentada.
Dúas pantallas en disputa
A disputa política coincide no tempo co evento oficial que organiza o Concello en Castrelos. Mentres o auditorio ao aire libre se prepara para recibir ata 2.500 persoas na platea, o goberno local insiste en que calquera espectáculo público deste tipo está suxeito a unha declaración responsable obrigatoria. Segundo fontes municipais, este trámite é indispensable para garantir as condicións de seguridade, accesibilidade e salubridade, algo que, afirman, non se cumpriu a tempo para o evento da Deputación.
Pola súa parte, o alcalde, Abel Caballero, evitou entrar na polémica directa polo precinto e centrou a súa mensaxe en animar á cidadanía a acudir a Castrelos, resaltando que é o «mellor escenario natural de animación do mundo».
O choque ten como pano de fondo a experiencia previa da final da Eurocopa 2024, cando a explanada de Montero Ríos acolleu multitude de seareiros. A Deputación pretendía repetir esa experiencia durante este Mundial, pero o desencontro institucional deixou, polo momento, a pantalla de Montero Ríos sen uso a escasas horas do inicio do encontro.
