A Garda Civil de Cangas detivo a un home de 72 anos, natural de Venezuela, como presunto autor dun intento de estafa de gran escala. O sospeitoso facíase pasar polo director xeral dunha recoñecida compañía petrolera con sede en México para enganar a unha empresa galega, reclamándolle 350.000 euros en concepto de gastos, taxas e comisións para pechar unha suposta operación comercial.
A investigación policial comezou o pasado 8 de xuño, despois de que a empresa afectada presentase unha denuncia nas dependencias da Garda Civil de Cangas. Tras un seguimento minucioso, os axentes lograron identificar ao home e localizalo na localidade de Sanxenxo, procedendo á súa detención o día 9 de xuño.
Usurpación de identidade e falsificación
Segundo informou a Garda Civil, o arrestado non só se facía pasar por un alto executivo, senón que utilizaba documentación falsificada con selos reais da petrolera mexicana e de servizos notariais dese país para dotar de aparencia de lexitimidade aos seus trámites. Ademais, durante as xestións, o home facíase pasar por outra persoa mediante a usurpación da súa identidade.
O detido enfróntase agora a acusacións por un delito de estafa en grao de tentativa, outro de usurpación de estado civil e un terceiro de falsificación de documentos, tanto públicos como privados. As dilixencias xa foron postas a disposición xudicial.
