O Goberno central ten previsto aprobar “nas próximas semanas” un novo real decreto cargado de medidas para tratar de poñer freo á crise da vivenda. O Ministerio de Vivenda e Axenda Urbana, dirixido por Isabel Rodríguez, busca articular un texto legal que ordene iniciativas xa anunciadas meses atrás e que agora se agrupan nun paquete que require consenso parlamentario para saír adiante.
O plan dividirase en dous eixos principais. O primeiro, enfocado en controlar os prezos e dar estabilidade, inclúe a regulación dos contratos de aluguer de temporada e por habitacións, así como a prórroga extraordinaria de contratos e bonificacións no IRPF para aqueles propietarios que decidan baixar ou manter as rendas. O segundo eixe céntrase na mobilización de vivenda asequible, destacando a subida do IVE ao 21% para os pisos turísticos e a simplificación de trámites administrativos.
Controlar o fraude no aluguer
Unha das medidas de maior impacto será a normativa para evitar o uso fraudulento dos alugueres de temporada. Esta modalidade utilizouse nos últimos anos en moitas cidades como alternativa ao aluguer residencial ordinario para esquivar límites de prezos e garantías legais. A nova regulación busca poñer fin a este mecanismo, definindo mellor as condicións de uso para garantir que a vivenda de residencia habitual estea protexida.
Tamén se actuará sobre o mercado das habitacións, moi demandado en zonas tensionadas, para evitar que se apliquen prezos abusivos que superen o custo dun piso completo. Ademais, incluirase unha prórroga extraordinaria “mellorada” para os contratos de aluguer, un intento de salvar unha medida similar que xa naufragou no Congreso a pasada primavera.
O reto do consenso político
A pesar da intención do Ministerio, o paquete enfróntase ao complexo escenario parlamentario. A aritmética na Cámara baixa volve ser o principal obstáculo para un Goberno que xa intentou lanzar parte destas propostas, como a subida do IVE aos pisos turísticos —anunciada por Pedro Sánchez hai 18 meses—, sen conseguir o apoio necesario para que se consolidasen.
Desde o Ministerio de Vivenda insisten na necesidade de chegar a acordos. Fontes do departamento subliñan que o obxectivo é presentar un texto que conte co respaldo de distintas formacións políticas, integrando tanto medidas de control como incentivos aos propietarios, coa finalidade de dar unha resposta efectiva á que consideran a maior preocupación da cidadanía na actualidade.
