As rúas de Ponteareas volverán encherse de deporte, ilusión e velocidade este vindeiro domingo 13 de setembro coa celebración da sexta edición do Trofeo Gran Premio Borja Gómez Méndez – Ciclismo Festas de Setembro. A cita, plenamente consolidada no calendario autonómico, presentouse oficialmente no Concello de Ponteareas nun acto que contou coa presenza da alcaldesa, Nava Castro, o tenente de alcaldesa, Juan Carlos González, o concelleiro de Deportes, Nico Rodríguez, e o directivo do Club Ciclista Ponteareas, Ángel Pérez.
A xornada arrancará puntualmente ás 09:30 horas e congregará a máis de 200 deportistas de toda Galicia e o norte de Portugal. A organización explicou que a liña de saída e a zona de meta estarán situadas nas inmediacións do concello. Desde este punto neurálxico, os ciclistas afrontarán un circuíto urbano de 3,5 quilómetros que discorrerá polas principais arterias e rúas do centro da vila, configurando un trazado técnico, rápido e moi vistoso para o público. Este circuito acollerá de forma sucesiva as probas das categorías de Promesas, Principiantes, Alevíns, Infantís, Cadetes e Xuvenís.
O concelleiro de Deportes, Nico Rodríguez, destacou o impacto deste evento no calendario local asegurando que “este gran premio é xa unha cita imprescindible que non só dinamiza as nosas festas, senón que premia o esforzo diario das escolas ciclistas. Para Ponteareas é un orgullo ver o centro urbano transformado nun circuíto cheo de vida, onde o ciclismo base demostra que o futuro do deporte galego está máis que asegurado”.
Fiel á súa filosofía solidaria e deportiva, a organización mantén o seu firme compromiso coa diversidade. Deste xeito, o evento volverá contar cunha proba especial inclusiva e adaptada, deseñada especificamente para promover o acceso universal ao deporte e visibilizar os valores de superación e compañerismo nun marco festivo incomparable. O trofeo rende homenaxe a Borja Gómez Méndez, referente deportivo local que encarna á perfección o espírito de loita na disciplina.
Pola súa banda, a alcaldesa de Ponteareas, Nava Castro, destacou que “o ciclismo forma parte da nosa identidade e do noso orgullo como pobo. Apoiar ao Club Ciclista Ponteareas e á súa escola é investir no futuro da nosa mocidade, fomentando hábitos saudables e dinamizando o noso municipio.” A rexedora tamén puxo de manifesto que “a nosa gran aposta é a inclusión real. A través do deporte adaptado e de referentes como Borja Gómez Méndez, demostramos que a bicicleta é unha ferramenta única para derrubar barreiras e garantir a igualdade de oportunidades para todos.”
