As seleccións nacionais e as 55 federacións membros da UEFA non participarán en ningunha competición da FIFA mentres se manteña en pé a proposta de transferir participacións e comercializar eventos como a Copa do Mundo con investidores privados. Tal e como anunciou este xoves o organismo europeo tras unha reunión extraordinaria, o rexeitamento á iniciativa impulsada polo presidente da FIFA, Gianni Infantino, é unánime e absoluto ao considerar que o torneo non pode ser tratado como un produto de investimento nin cederse a mans privadas.
A UEFA cualificou de «irresponsable» e un acto de coacción que a medida se xestase en segredo sen consulta previa, advertindo que a entrada de accionistas externos cambiará o deporte para sempre ao subordinar os calendarios, formatos e decisións futuras á rendibilidade financeira e non aos intereses dos afeccionados e xogadores. Ante este ultimátum, a organización europea esixe que o plan sexa abandonado por completo e que se acheguen garantías vinculantes para que a FIFA non volva abrir a súa gobernanza á propiedade privada, reafirmando que a Copa do Mundo pertence ao fútbol e non está en venda.
