O presidente da Xunta, Alfonso Rueda, anunciou este luns unha nova iniciativa estratéxica dotada con 40 millóns de euros para atraer grandes proxectos industriais a Galicia. A medida, definida como “pioneira”, utilizará a fórmula da compra pública precomercial para financiar consorcios empresariais que desenvolvan tecnoloxías avanzadas nos sectores da defensa, a seguridade e o aeroespazo.
O obxectivo final é claro: que as empresas non só desenvolvan aquí as súas innovacións, senón que tamén instalen a súa capacidade de fabricación na comunidade. “Queremos aproveitar a oportunidade dun sector estratéxico como o da defensa e a seguridade”, afirmou Rueda ao remate da reunión semanal co seu equipo.
Tecnoloxías con dobre uso
A conselleira de Economía e Industria, María Jesús Lorenzana, explicou que os proxectos deben ter un carácter dual, é dicir, que as solucións tecnolóxicas sexan aplicables tanto ao ámbito civil como ao de defensa.
As áreas de traballo son moi amplas e inclúen retos como:
- Vixilancia do litoral e xestión do medio mariño.
- Emerxencias, protección civil e rescate.
- Ciberseguridade e comunicacións seguras.
- Protección de infraestruturas críticas e xestión de recursos naturais.
- Mobilidade, loxística e atención social en zonas de poboación dispersa.
Requisitos e prazos
A licitación está aberta a empresas e agrupacións de operadores económicos que acrediten unha facturación anual media de polo menos 5 millóns de euros nos últimos tres exercicios e experiencia en proxectos de alta tecnoloxía. A Xunta valorará especialmente o impacto económico en Galicia e o compromiso de fabricar dentro da comunidade.
O proceso seguirase mediante un diálogo competitivo de tres fases para perfeccionar as propostas. As empresas interesadas teñen de prazo ata o próximo 30 de setembro para presentar as súas solicitudes.
Esta actuación é a primeira das tres grandes fases do Programa Ecosistema da Iniciativa Estratéxica en Seguridade, Defensa e Aeroespazo (Iesda). Este plan global prevé mobilizar ata 900 millóns de euros entre investimento público e privado, co obxectivo de crear máis de 500 empregos directos de alta cualificación ata o 2030.
Declaracións de Alfonso Rueda:
