Donald Trump anunciou este luns o restablecemento do bloqueo naval a Irán no estreito de Ormuz, unha medida coa que pretende exercer o control total sobre esta estratéxica vía marítima. O presidente estadounidense xustificou a decisión asegurando que os Estados Unidos actuarán a partir de agora como os “gardíns” do estreito, garantindo a libre navegación para todos os países, agás para os buques iranianos ou os seus clientes.
A nova política de Washington inclúe a imposición dunha taxa de compensación do 20% sobre toda a carga que transite pola zona. Segundo Trump, este recargo servirá para sufragar os custos de garantir a seguridade e a protección nunha rexión que cualificou como “moi volátil”. O mandatario defendeu o cobro desta tarifa argumentando que as nacións que se benefician do tráfico marítimo son “moi ricas” e que os Estados Unidos non deberían asumir gratuitamente os riscos e custos de protexer esta ruta.
Escalada militar e ameazas
A medida chega nun momento de máxima tensión, despois de que Trump dese por finalizado o alto o fogo e os recentes cruces de ataques entre ambos países. O presidente norteamericano foi contundente nas súas declaracións, asegurando que as súas forzas armadas golpearán “moi duro” a Irán tanto esta noite como mañá. Durante unha entrevista, afirmou que xa existen obxectivos militares identificados para estas operacións.
A ofensiva estadounidense ten como obxectivo minguar a capacidade de Teherán para atacar buques comerciais. Pola súa parte, Irán respondeu a estes movementos bombardeando diversos países aliados de Washington na rexión, como Kuwait, Baréin, Catar, Jordania, Omán e os Emiratos Árabes Unidos.
Este restablecemento do cerco naval rompe o memorando de entendemento asinado o pasado xuño, co que ámbalas partes buscaban avanzar nun acordo definitivo de paz. Coa nova estratexia, a administración de Trump busca afogar a economía iraniana e elevar a presión sobre o seu liderado. A implementación destas novas medidas e taxas, segundo o presidente, comezará “de inmediato”, aínda que non se detallou o procedemento técnico para efectuar os pagamentos.
