A Garda Civil detivo este venres a unha muller tras atropelar un axente durante un control de tráfico na estrada N-525, ao seu paso polo concello ourensán de Verín. A detida, veciña do municipio limítrofe de Cualedro, foi localizada pouco despois no lugar de Vilela, onde foi arrestada polo instituto armado.
Os feitos ocorreron arredor das 14:00 horas, cando a patrulla lle deu o alto á muller. Lonxe de parar, a condutora iniciou a marcha de xeito brusco, arrastrando ao axente varios metros ata que este logrou soltarse do vehículo. Na súa fuxida, a muller chegou a colisionar contra outro turismo antes de ser interceptada polo dispositivo de busca activado polas forzas de seguridade.
Delitos contra a seguridade viaria e a autoridade
Segundo informou a Garda Civil, a investigada acumula múltiples antecedentes policiais. Agora enfróntase a acusacións por un presunto delito de atentado contra un axente da autoridade e outro contra a seguridade viaria, dado que circulaba sen carné —por perda de vixencia—, sen seguro e sen a ITV en regra.
O axente ferido sufriu diversas contusións e erosións nos dous brazos, ademais dun traumatismo nun pé como consecuencia do arrastre. A muller, cuxa identidade non transcendeu, permanece baixo custodia á espera de pasar a disposición xudicial nas próximas horas.
