Foi o pasado 19 de decembro cando unha veciña de Sanxenxo acudiu á Garda Civil para denunciar un suposto delito de estafa. Iniciara unha conversa a través de TikTok cunha persoa para adquirir entradas para o concerto de Karol G o vindeiro 22 de xullo en Madrid.
Merca dúas entradas por un importe de 700 euros, inicialmente realiza unha transferencia bancaria de 200 euros e a continuación un bizum de 500 euros.
Unha vez realizado os pagos, a persoa que llas vende, autor do ilícito penal, bloquea a denunciante, polo que non pode falar nin tampouco lle envía as entradas por correo electrónico como acordaran.
O Equipo de Investigación da Garda Civil de Sanxenxo realiza diversas xestións encamiñadas á localización do autor do ilícito penal denunciado.
Compróbase que a conta á que se transferiu o diñeiro pertence a unha entidade bancaria de Barcelona e establécese o operativo necesario para comprobar que persoa retira os cartos das transferencias.
O pasado 18 de febreiro, no Posto da Garda Civil de Canovellas (Barcelona) procédese a investigar a un varón de 33 anos, con diversos antecedentes policiais por feitos similares, como autor dun delito de estafa.
As dilixencias son presentadas no Xulgado de Garda de Cambados.
Investigado un barcelonés por un presunto delito de estafa en Sanxenxo
