Ante a inminente chegada do verán, o conselleiro de Sanidade, Julio García Comesaña, declarou este martes que “non é preciso ter todo disposto” en canto a medios en Atención Primaria, pero si avogou por “reforzar”, se é posible, a atención urxente nos puntos de atención continuada (PAC).
En declaracións aos medios este martes na sede administrativa da súa Consellería en Santiago, onde participou na gala ‘Reimaxina a ciencia Galicia’, García Comesaña quixo diferenciar entre as urxencias e a atención ordinaria en centros de saúde.
Preguntado sobre posibles tensións asistenciais que poderían ocorrer no verán en zonas turísticas, o conselleiro afirmou que a demanda en Primaria “afortunadamente” é máis baixa. “Por tanto, non é preciso ter absolutamente todo disposto coma se estivésemos no mes de febreiro”, engadiu.
En canto aos PAC, a pesar dos problemas de cobertura de prazas en áreas sanitarias como a de Pontevedra-O Salnés, o conselleiro asegurou que “en ningún caso” redúcense o seu persoal. “Mesmo, se podemos, reforzámolo”, dixo a continuación.
“Cando alguén vén de vacacións, non ten para facer un control do neno san en pediatría, nin vai ao médico de cabeceira”, explicou, para seguidamente suxerir a posibilidade de que os facultativos atendan por teléfono, tamén para cuestións como renovar receitas.
Así, García Comesaña insistiu en que a atención nos PAC está “garantida” porque o Sergas fixo “un esforzo importante en todas as áreas” de fronte ao verán.
PECHE DE CAMAS
Comesaña rexeita falar de peche de camas hospitalarias no verán, tal e como denuncian colectivos como os sindicatos todos os anos, senón que “o que se fai é adaptar a planificación” dos servizos e os espazos ao verán pola “baixada da demanda”.
“As camas non se pechan, as camas sempre están dispoñibles. O que facemos é adaptar a nosa planificación, por unha banda, a esas necesarias e merecidas vacacións do persoal sanitario, por suposto, e tamén á demanda que temos de servizos sanitarios”, alegou García Comesaña.
O conselleiro reivindicou a experiencia de “moitos anos” no Sergas con respecto a esta cuestión, o que lles permite “estar tranquilos sabendo que a demanda sanitaria baixa notablemente” no período estival e facela compatible coas vacacións dos traballadores.
