HomeNewsActualidadeMarina Marroquí, figura destacada da programación do 25N en Mos

Marina Marroquí, figura destacada da programación do 25N en Mos

Marina Marroquí será unha das protagonistas da programación do 25N en Mos. A educadora social, especializada en violencia de xénero, participará o vindeiro 2 de decembro nunha dobre xornada que combinará o traballo directo coa mocidade e unha conferencia aberta á cidadanía para abordar dúas cuestións: a prevención da violencia de xénero nas primeiras relacións afectivas e a influencia do consumo de pornografía na educación sexual dos menores.

A súa visita ao municipio inclúe dúas propostas diferenciadas. Pola mañá, ás 10.00 horas, desenvolverá no Multiusos un obradoiro de sensibilización e detección precoz da violencia de xénero en adolescentes, dirixido ao alumnado de 6.º de Primaria dos colexios do Concello e de 1.º e 2.º da ESO dos institutos. A actividade incluirá o monólogo «Eso no es amor», no que Marroquí aborda as relacións afectivas e as manifestacións da violencia machista entre a mocidade.

A segunda cita será ás 18.00 horas, no salón de actos do Centro Cultural de Torroso. Baixo o título «Cómo construir una educación afectivo-sexual más allá del porno: una visión del consumo de pornografía por menores», Marina Marroquí ofrecerá unha conferencia aberta ao público xeral. A intervención centrará a atención no consumo de pornografía durante a infancia e a adolescencia e nos retos que isto formula para a educación afectivo-sexual.

Programación 25N

O calendario municipal arrancará o 25 de novembro, ás 12.00 horas, co acto central no Parque dos Multiusos. Baixo o lema «Pechemos a porta á violencia de xénero», realizarase unha instalación simbólica dunha porta como xesto de rexeitamento da violencia machista e unha homenaxe ás vítimas do ano 2026, con especial atención á vítima de Mos.

O 30 de novembro, ás 19.00 horas, a Biblioteca Municipal María Magdalena acollerá a presentación do libro «Detrás de una sonrisa», nun encontro aberto ao público.

A programación complétase co Programa RENACE, de apoio e acompañamento ás mulleres participantes, que xa está en marcha, e con charlas sobre igualdade e prevención da violencia de xénero nos centros educativos e en diferentes entidades sociais do municipio.

Mesa local de violencia

O 17 de novembro, o Pazo de Mos acollerá a reunión da Mesa Local de Violencia, na que o Centro de Información á Muller (CIM) dará conta das actividades desenvolvidas ao longo de 2026 e das actuacións levadas a cabo no municipio en materia de prevención e loita contra a violencia de xénero. No encontro participarán os diferentes colectivos e axentes locais implicados nesta loita, co obxectivo de compartir o traballo realizado e coordinar as actuacións desenvolvidas desde os distintos ámbitos.

Artigos relacionados

OUTRAS NOVAS