O sistema sanitario enfróntase a unha nova escalada de tensión despois de que o Goberno central aprobase este martes o anteproxecto de lei do novo estatuto marco, unha norma chamada a rexer as condicións laborais de case un millón de traballadores sanitarios e a substituír o texto vixente dende o ano 2003. O documento inicia agora a súa tramitación parlamentaria no Congreso dos Diputados, onde se prevé un debate complexo debido á oposición dunha maioría dos grupos políticos e ao choque frontal co colectivo médico.
A portavoz do Executivo, Elma Saiz, defendeu en rolda de prensa que o novo texto supón «unha mellora substancial das condicións básicas para todos os profesionais e permite adecuar a normativa ao presente e ao futuro do modelo asistencial». Pola súa banda, a ministra de Sanidad e impulsora da norma, Mónica García, sinalou a través de redes sociais que traballará para lograr o respaldo parlamentario das melloras laborais, subliñando como eixo central o obxectivo de «acabar co as gardas de 24 horas». No lado oposto, o Partido Popular criticou duramente ao presidente do Goberno, Pedro Sánchez, ao considerar que aproba a normativa «sen respaldo dos facultativos» e facendo seus os ataques aos médicos.
Sen interlocución cos médicos e ameazas de protestas
O Comité de Huelga deu por «agotada» a vía de diálogo co Ministerio de Sanidade, denunciando a «cerrazón» de seguir adiante a pesar dos meses de mobilizacións e de non buscar un achegamento durante o verán. Baixo a premisa de que «non haberá Estatuto Marco para os médicos sen contar con os médicos», os facultativos manteñen a convocatoria dunha folga indefinida para este outono. O colectivo reclama un convenio específico que recolla as particularidades da súa responsabilidade, a súa carga de traballo e unha categoría profesional propia.
Fronte ao rexeitamento dos sindicatos médicos —entre os que se atopa o sindicato galego O’Mega—, a norma si recolle o aval de organizacións como UGT, CC.OO., CSIF e FSES, que alcanzaron un pacto en xaneiro xunto ao Sindicato de Enfermería (Satse). Esta última formación urxe agora aos grupos do Congreso a non demorar a tramitación para que a lei entre en vigor na actual lexislatura, un texto que no caso de enfermaría recoñece por fin a súa categoría profesional como grao universitario fronte á antiga diplomatura.
Novas limitacións horarias e fin das gardas de 24 horas
O anteproxecto introduce modificacións significativas na organización da xornada laboral, fixando un límite máximo de 45 horas semanais e abrindo a porta a implantar progresivamente a xornada ordinaria de 35 horas. Un dos cambios máis destacados afecta ás gardas, que quedan limitadas a un máximo de 17 horas —un tope que tamén se aplica á suma da xornada ordinaria seguida de garda— e prohíbe traballar de maneira inmediata tras rematar un turno nesa modalidade sen necesidade de recuperar o tempo. As gardas de 24 horas quedarán relegadas á excepcionalidade, exixindo consentimento expreso e limitándose a festivos, fins de semana ou postos de difícil cobertura, mentres que superar as cinco gardas presenciais ao mes consideraráse carga horaria excesiva e obrigará a activar medidas preventivas.
O articulado tamén aborda a conciliación e os dereitos laborais cunha maior flexibilización e a planificación anual anticipada de turnos. Amplíanse as exencións de realizar gardas para persoas maiores de 55 anos, embarazadas, períodos de lactación, problemas de saúde e reducións de xornada por coidado de fillos, incorporando ademais dereitos como a desconexión dixital, a protección fronte a agresións e o impulso á docencia e investigación. Finalmente, establécese que os procesos de selección de persoal fixo sexan polo menos bienais cun prazo máximo de resolución de 18 meses.
